طرائف الفنان أبو داؤود .. (بوست مقتبس)

يعتبر الفنان أبو داؤود فلته زمانه جميل الروح واللسان رحمه الله رحمة واسعة
وزاده بالحسنات احسانا وبالسيئات عفوا وغفرانا
يستحق ان توثيق طرائفه فى شكل كتيب
لانه ارتبط فى اذهان كل اهل السودان بروح الفكاهة والمرح ... وفي هذا البوست
ادعوكم جميعاً بالمشاركة بكل ما تعرفونه عن نكات وطرائف لهذا الفنان العملاق
(هذا البوست مقتبس من بوست نشر في سودانيز اون لاين للزميل ناذر الخليفة)

---

ابوداؤد كان بغنى فى حفلة والصف الاول كان
كلو جكس حجم عائلي كلو واحدة اسمن من التانية
وبعد الاغنية الاولى قام الجماعة كوركو ليهو
بالله يا استاذ فريع البان ...قام عاين ليهم وعاين
للصف الاول...وقال ليهم فريع البان كيف مع
شجر التبلدى بتاعكم دة

---

قالوا ابوداؤود كان شغال حفلة وبعد ما غني الفاصل الاول الجماعة نادوه للعشا فعلي حسب عادته قال عاوز يتعشي مع الجمهور
قام قعد في طربيزة ومعاه مجموعة
جات الصينية الاولي عاين فيها لقاها ... الضلع (رقبة)..عاين للصينية التانية برضو لقي الضلع( رقبة )(الجماعة كانوا ضابحين خرفان كمية)التلتة برضو كدا
قام نادي العريس وقال ليهو اسمع يا خوي انتو ضابحين زرافة ولا شنو؟؟
سنواصل ....كونوا معنا ********

ومن الطرائف التى يحكيها عبد العزيز محمد داؤود عن زوجته
الفاضلة فوزية محمد حسين انها ابان الفترة الاولى من زواجهما..
ظلت تسال عبد العزيز كحال اى عروسة جديده تود ان تعبر عن حرصها على زوجها..
تساله:عبد العزيز ماشى وين ؟؟
يقول: الاذاعة…
هى: وحتجى متين انشاء الله ؟؟؟
هو :بعد ساعتين..
و فى وقت اخر:عبد العزيز ماشى وين؟..
هو عندنا حفلة عرس فى امدرمان...
هى :وبتجى متين انشاء الله ؟؟؟
هو: بعد اربعة ساعات
..وهكذا من يوم لاخر..وفجاة بادرها يوما...تعالى انتى يا فوزية انا مؤجر منك عجلة!!!!!؟؟؟

سنواصل ....كونوا معنا ********