بدون زعل ياهلالاب

ياهلالاب قبييييل قلتوا الكفر أسيادو

وقلتولنا الهلال مابينهزم في استادو

قلتولنا الفريق في كامل استعدادو وفريق مازيمبي يتقدل تقول فيي بلادو

القلتولنا معروف مقبره ابطال

دفنكم فيها مازيمبي ورقادكم طال

لو كان عندكم في الكاس بصيص آمال مباراه الاياب ابقولنا فيها رجال

كلامكم في الجرايد كلو ماكان صاح

وحقوا يكتبوكم فيهو استيضاح

فريق مازيمبي في كل الخطوط مرتاح وانتومعاهو في الميدان تقول اشباح

الراجيك تجيبلو الخمسه جات معكوسه

في ليله الاحد مازيمبي كان كابوسا

تجاربو الخاضا كلها ما استفاد بي دروسا مافادوهو لا امبيلى لا ايفوسا

قلتولنا الهلال بدر اكتمل متجلي

وفى ليله التمام ظهر الخسوف الكلى

الكنغولى لى اقوانو مابتجلي خمسه اقوان تقول اكّنتو لاعبين بلّلى

بعد عشرين دقيقه بدا الهلال ينهار

لقى شويه هبوب بي قطعه التيّار

انبهط المدرب وفي البقت محتار سيد الدار بقى الضيف وضيفو سيد الدار

ليلتك يالاحد لهلالنا اسود ليله

مطر مازيمبي غلب ودفاعا كترو السيله

التوفيق بعيد ماجانا بالتشكيله صحيح احرزتوا قونين علّا ماخدين(كيله)

زغاريدنا وكروت افراحنا ماليه الديره

دلاليك الكسمبر هابكه لاحقه السيره

هلالنا مجرتقنوا هلال وسوط وضريره زنبي عليك يا مازمبي خمسه كتييييره

الليله الهلال في استادومقطوع ريحه

وفيهو عشمنا كان يحرز نتيجه مريحه

غرقت مركبو من اول التلقيحه لاتنغشوا ياللخوان نتيجتو فضيحه

ماكان عندو كوره نزلت عديل في مكانا

اول قون فرحنا الا العشم غشانا

مالقينا الولد من الغلب فشّانا ياااا امبيلى معاهم انت ولا معانا؟؟

الاسما القبيل متل الدهب لمعانا

ماقايلنها بتغيب قبل اوانا

لا ايفوسا لا مساوي نالوا رضانا

بعد ها الحاله نرجي الفي الاياب راجيانا

بعد ها الحاله نرجي الفي الاياب راجيانا