أغانى الحقيـبة: ذلك الفن الخالد

أغانى الحقيبة:
من منّا لم يردد أو يترنم بكلمات أغنية من أغانى الحقيبة أو يستمتع بألحانها؟
فبالرغم من مرور زمن طويل على تلك الحقبة التى ظهرت فيها أغانى الحقيبة،
مازالت تلك الأغانى يرددها معظم المطربين، ومازال الغالبية من المستمعين يفضلون
الإستماع والإستمتاع بكلماتها وألحانها.
فى هذا البوست تعالو معا لنلقى بعض الضوء على هذه الأغانى التراثية الخالدة والتى
تعتبر دعامة الفن السودانى الأصيل.
تســــمية الحقيـــــبة:ــــ
(منقول بتصرّف)
أطلق مصطلح "حقيبة الفن" على الغناء في تلك الحقبة من مراحل الغناء السوداني
نسبة إلى كلمة حقيبة وهي ترجع في الأصل إلى أن كل من المغنين والعازفين كانوا
يحملون معداتهم في حقائب عند توجهم لإقامة حفل معين حيث عرف الناس هذه الحقيبة
بحقيبة الفن.
ويقـول مصدر آخر:
حقيبة الفن إسم راسخ في وجدان الشعب السوداني كمفهوم لأغاني حقبة معينة وثرة
من تاريخ الغناء وإستمرت من العقد الثاني الى بداية العقد الخامس من القرن الماضي
بالسودان. وإنداح الأسم ليشمل شعراء وفناني الحقيبة من رواد الفن الأوائل فأصبحنا
نقول في عفوية: شعراء الحقيبة والذين أنفسهم إرتضوا هذا الاسم.
بعض شعراء أغانى الحقيبة:
صالح عبدالسيد أبو صلاح وسيد عبدالعزيز وخليل فرح ومصطفى بطران وإبراهيم
العبادي ومحمد ود الرضى وعبيد عبدالرحمن ومحمد بشير عتيق وغيرهم.
من المطربين الحديثين الذين تغنوا بكلماتهم أمثال:
إبراهيم الكاشف وعبدالحميد يوسف وحسن عطية وعثمان الشفيع والتاج مصطفى
وعثمان حسين وإبراهيم عوض وعمر أحمد وأحمد الجابري ورمضان حسن ومنى الخير
ومحجوب عثمان وصالح سعد وغيرهم .
إتفق النقاد على أن أغاني الحقيبة تبدأ بتلك النقلة التي أحدثها الحاج محم أحمد سرور
عام 1920 م عندما إستغنى عن الطنابرة وأعتمد على الكورس ثم أدخل ألة الرق
والمثلث وتنتهي بالنقلة للغناء الحديث بمصاحبة الفرق الموسيقية وإدخال اللزمة الموسيقية
التي أدخلها الفنان العبقري إبراهيم الكاشف في مطلع الاربعينات ولذلك فأنها تعرف بأغنية
مابين الحربين العالميتين الأولى والثانية وتعرف أيضاً بأغنية أمدرمان العريقة وكانت
بيوت الأفراح بأمدرمان، هي مسرح تلك الأغاني وبالطبع فأن أغاني الحقيبة لاتمثل بداية
الغناء في السودان، ومن قبلها كانت أغاني السيرات والدوبيت والحداء وأغاني التراث
كالمناحات والحماسة وأهازيج العمل الجماعي والحصاد وأغاني المهد للأطفال ونغمات المديح وإنشاد الذكر وإيقاعات الطار والدلوكة والنوبة و تقول الجدات والحبوبات عند المبالغة في
القدم أن هذا الشئ أقدم من العديل والزين .
وقد تكون أغاني الحقيبة هي بداية الغناء الحديث بأمدرمان . وكان الأستاذ الدبلوماسي
والشاعر الإعلامي صلاح أحمد محمد صالح قد خشى على هذا التراث من الإندثار فأفرد
له برنامجاً بإذاعة أمدرمان عام 1945م أطلق عليه إسم (من حقيبة الفن) وظل البرنامج
يقدم بالإذاعة منذ ذلك التاريخ إلى يومنا هذا، وقد تعاقب على تقديمه عدد من الإعلاميين
أشهرهم الأستاذ علي محمد شمو والمبارك إبراهيم والسر محمد عوض والأستاذ عوض
بابكر الذي لايزال يواصل إعداد وتقديم البرنامج باسم حقيبة الفن .
والجدير بالذكر أن إسم حقيبة الفن ليس تصنيفاً لأغاني تلك الحقبة ولكنه أسم خطر على
بال مبتدعه الأستاذ صلاح محمد صالح، أما التصنيف العلمي والفني لأغاني تلك الفترة
هو (المدرسة الفنية الأولى) كما يقول بروفيسور الفاتح طاهر في كتابه ( أن امدرمان
تاريخ الموسيقى في السودان ).
سأعود لاحقا بإيراد كلمات بعض الأغانى، وأرجو من الجميع المشاركة بقدر الإمكان.

النماذج سيتم إيرادها عشوائيا من غير ترتيب.
نبدأ بـــــ:
"حجبوه من عيني إلا من قلبي ما قدرو حجبوه"
كلمات الشاعر: عبيد عبد الرحمن
ألحان: الحاج محمد أحمد سرور
غناء: إبراهيم الكاشف
وهى أوّل أغنية تغنّى بها الكاشف

حجبوه من عيني
إلا من قلبي ماقدرو حجبوه
حجبوه من عيني
وضاروه حاسدنى
بقوا بينو ما بينى
لا أدرى ماذنبى
منعوه من حيى
وبعدوه من قربى
وأبوا لا يبارحوه
هو منطقي وذوقي
سمّوه معشوقى
الليهو زاد شوقي
مع أنّو في قلبي
هو الوحيد حبي
يا عوازلي وصحبي
بس ما تشوفوه
هو ما بتشوفو عيون
وما حامو حولو ظنون
وديع رقيق وحنون
هو القطعة الشيقة
والشمس المشرقة
والنار المحرقة
أهو رمز حلوه
ــــــــــــــــــــــــــــــــــــــــــ
يللا يا جماعة همّتكم معانا

لا بقى يا أستاذة وصال بوستك دى يحتاج إلى
اجازة عرضية ...
وكدى موقتا كدا هاك ايام صفانا للشاعر عتيق ..
---
أذكري ايام صفانا واذكري عهد اللقاء
والليالي الفي حبور
اذكري ايام صفانا والليالي الفيها متبادلين وفانا
جينا بي كل اقتراح
من حديث يشفي الجراح
بي مغازلة وانشراح
والقمر بي ضياهو آلق والنسيم يهدينا انفاس الزهور
كنا داخل روضة مافيش حد سوانا
غير ان القمري يهتف بي هوانا
من اهازيج فنه يسمعنا اسطوانة
اما ارواحنا الخفاف
رافلة في اثواب عفاف
زي عرائس يوم زفاف
والنجوم بي عيون تسارق في اشتياق
تنظرنا من خلف الستور
الرياض مبتهجة داخل اقحوانا
والزهور نديانة تستقبل اوانة
زاهية يانعة ورايعة في توب ارجوانا
والنهر لينا اقترب
والطيور تسجع طرب
عاملة موسيقة قرب
انحنا صار مجلسنا عامر في طرب
في قبطة في نشوة وحبور
يا أنيس الحسن يا سامي المكانة
من عواطفك حبي لو فاقد مكانة
اهدي لي تفاحة بس او برتكانة
فهي غير شك مرضية
بيها اقتبس الضياء
بل اذوق طعم الحياة
انت ملهمني الاغاني
وانت مصدر فني
احساسي وشعوري

شكرا أستاذ عمر على المشاركة
وفعلا أغانى الحقيبة دى دايرة ليها إجازة مفتوحة
ـــــــــــــــــــــــــــــــــــــــــــــــــــــــــــــــ
اليوم أقدّم ليكم:ـــ
عازة في هواك
للشاعر خليل فرح

عازة في هواك عازا نحن الجبال
وللبخوض صفاك عازا نحن النبال
عازة ما بنوم الليل محــــال
وبحسب النجوم فوق الرحال
خلقة الزاد كمل وأنا حالي حال
متين أعود أشوف ظبياتنا الكحال
عازا ما سليت وطن الجمــال
ولا أبتغيت بديل غير الكمــال
وقلبي لي سواك ما شفتو مال
خذيني باليمين وانا راقد شمال
عازة ما نسيت جنــة بلال
وملعب الشباب تحت الظلال
ونحن كالزهور فوق التلال
نتشابي للنجوم وانا ضافر الهلال
عازة جسمي صار زي الخلال
وحظي في الركاب صابه الكلال
وقلبي لسه ما عرف الملال
أظنه ود قبيل وكريم الخلال
عازة ما أشتهيت نوم الحجال
ولا السوار بكي في يمينا جال
وعازة في الفريق لي ضيق مجال
قبيلة بت قبيل ملأ الكون رجال
***
عازة شفت كيف نهض العيال
جددوا القديم تركوا الخيال
روحك أم سماح سري كالسيال
شجوا الفؤاد حيوا محسور الليال
عازة في الفؤاد سحرك حلال
ونار هواك شفا وتيهك دلال
ودمعي في هواك حلو كالزلال
تزيدى كل يوم عظمة ازداد جلال
***
عازة في حذا الخرطوم قبال
وعازة من جنان شمبات حبال
وعازة لي ربوع ام در جبال
وعازة في الفؤاد دوا يشفي الوبال

يا مداعب الغصن الرطيب
كلمات الشاعر/ سيد عبــد العزيز

يا مداعب الغصن الرطيب
في بنانك إزدهـت الزهور
زادت جمال ونضار وطيب

يالمنظرك للعين يطيب
تبدل الظلمــات بنور
وتبدل الأحـزان سرور
إن شافك المرضان يطيب

تعجبني والشئ العجيب
هادي وأليف معاك النفور
بحصنك صنت السفور
والحسن والأصل النجيب
أنا وأنت في الروض يا حبيب
راق النسيم وحلى للمرور
بقى أحلى من ساعة السرور
وأدق من فهم اللبيب

والروضة في موضع خصيب
حضنوها واتلفوا النهور
ترى فيها أنواع الزهور
من كل لون أخذت نصيب
يانع ثمارها وغض وطيب
أشبه بربات الخدور
الاتبرجن في يوم حبور
زادن جمال ونضار وطيب

في الروض غنى العندليب
ورددوا غناه الطيور
ترتيل أناشيد الحبور
وفتياتها يوم عيد الصليب
دنت الثريا بقت قريب
بين السلوك في تاني دور
في ثانية كم سطعت بدور
وأهلّة كان نوعن غريب

شئ ينعش الروح في الأديب
ويحي روح ميت الشعور
للقاه ترتاح الصدور
ويفرح القلب الكئيب

ودى واحدة من الروائع المدهشة
للشاعر محمد على عبدالله الأمى
يقال بعد إنتهى من كتابتها رقد
زى شهرين عيان .. متوك تب .
---
إنــت حكمــة
إنــت آيــة ولا إنســان
إنت صاحي ولا نايم
ولا طـــرفك مـــن طبعـــوا نعســــان
إنــت راحــى إنــت روحــى إنـت إنسان
عينــى يــا صاحــى وإنــت إحســـان
إنــت نــادى إنــت هــادى وإنــت ميسان
إنــت ضامــر إنــت سامــر إنــت هتــان
إنــت نــادر إنــت ناضــر إنــت بستـــان
إنــت صافــى إنــت ناقــى زور وبهتــان
يــا حياتــى يا مماتــى هـــاك سطــران
الصبابــة ومــر عذابهــا وقلبــي أقــران
وإنــت ساهــى إنــت لاهــى إنـت بطران
يا صفائــى يــا وفائــى هــاك برهــان
عن غرامى وطول هيامى السابنى ولهان
عــز قربــك أمــا بعــدك مالــه لــى هـان
قلبــي خافــق هــل توافــق قــدرى ينهـان
يــا حبيبــي كــن طبيبــي أمــرى حيـران
طــول نهــارى ثــم ليلــى ساهى سهـران
طال عذابي وصاح غرابى جوى عكـران
دمـعى هامى وشوقى نامى وفرشى نيران
إنــت حالــى إنــت عالــى إنــت سلطــان
إنــت ساطــع وانا ساجــع بي غناك طان
طال أنينــى وفــاق حنينى ألحان لأوطان
واليلومنــى فــى هــواك يا سيدى غلطان

حقو يا استاذة وصال والجميع تدونا نماذج بالغناء
تخلونا نبتهج مرة واحدة..
و Just in case دا شرح مبسط لطريقة
رفع الفيديو فى الموقع ونطالب اخونا الفنان
المنذر كمان يفعل خاصية رفع الـ الأوديو .
----
*افتح يوتوب ثم الاغنية التى تود نقلها ..
شكل 1

من هذه الخيارات إختار share
الشكل 2


ثم افتح options
فى options كِلك على Long link
فى المربع بظهر رابط الفيديو كامل تظللوا وتعمل كوبى
بعد هذه الخطوة ...
تجى الموقع صفحة المداخلات من صف الأكواد إختار (مقطع فيديو)
الشكل 3

كِلك داخله ..يفتح معاك ..خت الرابط بتاعك واعمل نعم
ونعم الله عليك وبس ..طوالى الفيدو بظهر



* معليش يا أستاذة وصال مانكون خرمجنا البوست
والتحيات

شكرا كتير أستاذ عمر على الشرح المدعّم بالصور
والله عرفت بيت الداء صحى الجهل مصيبة
طبعا لا أفقه فى التكنولوجيا الكثير وإن شاء الله أجرّب تنزيل الفيديوهات،
وإذا الحكاية ما ظبطت معاى، خلاص أخلى ليكم المهمة دى ومشكور كتير.
أمّا بخصوص هذا:
"* معليش يا أستاذة وصال مانكون خرمجنا البوست"

أبدا والله ـ العفو ـ البوست لا إتخرمج ولا حاجة، بالعكس هو إقتراح إرفاق
الفيديوهات فى محلو وفكّرت فيهو من البداية، لاكين بس تقول شنو
الفهم قسم

والعبادى..ياعازة الفراق بى طال

يا عازه الفراق بي طال
وسال سيل الدمع هطال
**
طريت برق الفويطر الشال
وساح دمعي البكب وشال
كمل صبري ومنامي انشال
لبس من ناري عمه وشال
**
أرض آمالي في امحال
ومن الهم بقيت في أوحال
وبعدك عزه ساء الحال
منامي وصبري أضحى محال
**
حليل الناسا وناسا
طريت أم در حليل ناسا
وكيف أنساها وأتناسا
ومفتون بي ظبي كناسا
**
ولع جوفي جمري الحي
وما بتطفيه آه وأحي
فيا زينة ربوع الحي
لي دياركم يعود الحي

شكرا أستاذ عمر على مشاركتك الفعّالة.
ـــــــــــــــــــــــــــــــــــــــــــــ

جاني طيفه طايف
للشاعر عبدالرحمن الريح

جاني طيفو طايف لحظو كالقذايف
وأنا من عيونو خايف
من عيونو خايف

جاني طيفو طايف في ثوب من الطرايف
خدودو كالقطايف ليهو العنب شفايف
العنب شفايف

حبيبي دمعي زارف غرقني سيلو جارف
لماذا عني صارف وهالكني وإنت عارف
إنت عارف

حبيبي أنا حالف في عوازلي ليك أخالف
قلبي ليك محالف ومتي ياغزال توالف
يا غزال توالف

تلا في هواي صحايف ولقي حبي غير زايف
قال لي أراك خايف ودون تشرح أنا شايف
أنا شايف

يا ملهم العواطف ومهدل المعاطف
متي يا جميل تلاطف وتكون علينا عاطف
علينا عاطف

يا أستاذ عمر إدريس إتوكّلت على الله وعملت نفس الخطوات لتنزيل الفيديو
عموما شكرا جزيلا على محولة تثقيفى تكنلوجيا
غايتو لو ظبطت، خلاس يا اليو تيوب جاك بلا

I gave up

I gave up

هههههههــــ

مابدرى يا أستاذة ؟ كدى قولى خير ...

انتى عملتى خطوات جبارة (لكين) فقط الفيديو الإخترتيهو عندو نزلة كدى شوفى واحد غيرو

غايتو إتأكدت إنو نزلة البرد فى راسى ده ولا فى كمبيوترى يا أستاذ عمر
لأنو إخترت مقطع فيديو تانى وما ظهر وقمت بحذفو، أحسن لىّ أبعد من
الحكاية دى عشان ما يحصل لىّ المزيد من الإحباط والإمبرسمنت
بجى راجعة بعدين وشكرا على الدعم والمشاركة.

أغنية أقيــــــــــس محاســـــــــــنك بمـــــــــــن
أداء الفنان سرور

أقيس محاسنك بمن
ياالدرة الماليك تمن
والله نور عينيّ نور الزمن
ما شوفنا في طول الزمن
سواك بدري في داخل كمن
الأنوار يتزاحمن
في خدودك أخدن أمن
ومن فاهك يتقسمن
بروق في بروق يتقسمن
دي الدنيا أم جنة عدن
شوفنا ملاك لابس بدن
إنسان لكن مفرداً
حاز النور حاز اللدن
غصنه مهفهف أملداً
وهيبة أسد في عيون شدن
يالجبرة المازجة العجن
جبينك زي فلق الدجن
وجسمك بالطيب إنعجن
إذا النسمات بيك عرجن
طبقات الجو يتأرجحن
والأنفس يتهيجن
أنت نرجس من الوسن
لعيونها الأعين جسن
وإن آية الحسن الأسن
وغصون الروض يتمايسن
في ذاك الزي الحسن
وكل حُسن مالك حَسن
روضك زي عارضين صفن
حلال سحرك ما سحر فن
كواكب النور البلصفن
بصفاتك ما إتوصفن
بدور الكون لوينصفن
يسجدن ليك مايكون وفن
فيك عيون الرائين يرن
محاسن بالحسن إزدرن
ومهما أفكارهم يكبرن
زي حسنك مايعبرن
مع البدرين سيرك سرن
ومن وزنك هن يقصرن

عيـــــــــــــــــــــــــــون الصيـــــــــــــــــــــد

كلمات الشاعر محمد على عبدالله الأمى
تغنّى بهذه الأغنية كرومة وسجّلها للإذاعة الفنان عوض الجاك
والفنان التاج مصطفى

عيون الصيد ناعسات عيوني ..... عيون النيل حاكن عيوني
نسيت قلبي وروحي ونسوني ..... وفقدت الكانوا يؤانسوني
ليالي هناي جد عاكسوني ..... وأخاصم النوم كيف درسونى
مع الآلام هاجت شجوني ..... وأطباء الكون ما عالجوني
جفوا بنفورهم هيّجوني ..... متين في الطيف يصبو ويجونى
فقدت صحاب لا تنصحوني ..... خطاب وعتاب كفى بارحونى
عيون الصيد ديل جرحوني ..... سروري يتم لو يلمحوني
غلبني أسير هيا درجونى ....... وعلى الأطلال ليل عرجونى
هواى شريف لا تحرجونى ..... وعلى الأكفان شيش درجونى
مقر املى فيهم ظنونى ..... يزيدوا دلال وتزيد جنوني
لذيذ تعذيبهم لو ضنونى ..... وصالهم آه راحتي ومنوني

فى الطيــــــــــــف أو فى الصحيـــــــــــــان
كلمــــــــــات الشاعر/ عمر البنا


في الطيف أو في الصحيان زورني
يا حبيبي أنا عيان
مالو لـو فـي بعـض الأحيـان
تسمح لـي صحـوا أراك عيـان
تاخذ يا حبيبي عـن حالـي بيـان
عسى تبقي قلوبنا في الغرام سيـان
يا الفريد في حسنك و بهجة أمدرمان
لي من شوفتك يا حبيبـي زمـان
أنا ساهر و نـوم عينـي حرمـان
و إنت بين أترابك في نعيم و أمـان
النحول علي جسمي يا حبيبي بيان
و إنت جسمك نامي و بالنعيم طربان
لو رأك الناسك المـن الله جبـان
بيك يفتن و يصبح بالغـرام تعبـان
قبل حسنك قط ما رأيـت إنسـان
فاق العسجد لمعة و الحريـر لمسـان
كيف يحصر وصفك يا حبيبي لسان
و البان إتعلم من قامتـك الميسـان
ما الـدرر لثنـاك ما بنـت ألحـان
للمـاك و آيـة نفحـة الريـحـان
إنت حسنك كامل لكـن لمحـان
خدك قاسـي و قلبـك ما حـان

أنـــــــا صـــادق فـــــى حبــــك
كلمات الشاعر/ عمـــر البــنا

أنا صادق في حبك لو قلبي
يتصل بي قلبك .. هذا مقصودي
********
أنا أقصد ودك وأنت تحرمني
النظر في خدك .... لأذاي
ديمة باذل جهدك مع علمك بهواك
منذ أيام مهدك ... إنت مريودي
أمتى تنجز وعدك وعني يذهب نحسي
ولي يطلع سعدك ... يا حبيب غثني
ما بطيق نار بعدك وأنت عارفني
ما بعيش من بعدك ... إنتهى وجودي
*******
الشباب في عصرك جملة معترفين
لجمالك وحسنك .. يا مهدّل يا مفدّل
يا المهفهف خصرك الكواكب والحور
قاصرين عن قدرك .. كيف أنا هجودي
*******
أمتى يفرج سجنك وأشوف صورتي
في مراية وجنك ... تنجلي عيوني
بي تغزُل حسنك أكوي عزالي
بالتقرب منك وفيك أرى سعودي
******
قال لي لازم .. صبرك من وصالي قريب
الدخول في قبرك من زمن يا عشوق
لي قاهر أمرك والعفاف يمنع قلبي
ليك يتحرك .. والجفا شهودي
******
قلت له بحق .. ربك أسلي كل .. أهلي
لو حظيت بي قربك حظي لو ... ساعد
ثانية بس أظفر بك بعد ذلك أموت
ما في شك بفخر بك إنت مريودي

الاخت و صال شكر علي العمل الرائع و اقدم ليكم مساهمة و ا ارجع للموضوع
ليالي الخير جادن — ود الرضي

ليالي الخير جادن…………….من المحبوب


نسائم الليل عادن…………….من المحبوب

شفت في الأحلام ظبى يتهادن…..برخيم نغمات خلى تنادن

عبرات الشوق بى ازدادن……تلكم أحلام ليت تمادن

شفت الحسن الحافل رافل …..في ثياب العز والعز كافل

رانع واحل تايه غافل……..لادن هادل ضامر كافل

هادئ ساكن آمن قادل ……..بهجة هيبة حاكم عادل

لافح فره وطارح سادل……ليل عسعس كاسى الهادل

بوبح جيده وأبصر واقل ……ظن مراقب صدق العاقل

قلب المخضوب فوق الفاقل……..تل اليمنى ومشى متاقل

رنا متخاوف بارق لجّ………بعضه فى بعضه ترادف لجّ

نصفو تثنى وآخر لجّ ………..لاطم أمواج من غير لج

رفع الهدب شفت محور ……….نوره تدفق صعد أتدور

فكر في شئ فضل أتصور…..بسم النوار فتح نور

فيه تأمل أيسر بند ……….لدن المثمر غصنه البندى

مايقه ترقرق شهر الهندي ……… فوح منو العرف الرّندى

وصحيت ندمان نومي انقل……..تناوم غش وقواي كل ّ

حاولت النوم لكن كلا………هيهات يعود الكان ولّى

والقصة تقول إن الشيخ محمد ود الرضي كان يحب إحدى الفتيات وكان يريد الزواج منها ولقد غاب فترة من البلد إبان عمله بخزان سنار ولكن حين عودته وجدها قد تزوجت من احد الرجال المعروفين ..وتصادف أن رأى ود الرضي في منامه انه وفي مايرى النائم أنه مرّ بأمام منزل الملهمة وكانت أبواب المنازل تصنع من المطارق وهى أعواد الأشجار ويمكن لاى شخص أن يرى ما بداخل المنزل من بينها …فشاهد ود الرضي هذه الجميلة..فماذا شاهد…

شفت الحسن الحافل رافل …..في ثياب العز والعز كافل

رانع واحل تايه غافل……..لادن هادل ضامر كافل

هادئ ساكن آمن قادل ……..بهجة هيبة حاكم عادل

لافح فره وطارح سادل……ليل عسعس كاسى الهادل

هذا هو الجمال والحسن والروعة التي شاهدها ود الرضي…ولكن هذه الجميلة شعرت هنالك من يراقبها وينظر إليها من بين الفتحات ….فماذا فعلت ؟..من عادة النساء في السودان في الأيام التي ليس فيها مناسبة أو عيد يخضبن الكف الأيسر…فلما رأت هذه الملهمة من يراقبها هزت جيدها ووضعت يدها المخضبة وهى اليد اليسرى على وسطها وتلت اليمنى ومشت على مهلها يتثنى قوامها ويتمايل بعجن يكاد أن ينقسم ..

بوبح جيده وأبصر واقل ……ظن مراقب صدق العاقل

قلب المخضوب فوق الفاقل……..تل اليمنى ومشى متاقل

وعندما وقلت بعينها مستغربة رأى ودالرضى العيون التي يشع ويتدفق النور من كل جوانبها …وترقرقت عيونها بالدموع فأصبحت جارحة كالسيوف الهندية …أما قوامها اللادن فقد أثمر وفاحت منه العطور الطيبة ..

رنا متخاوف بارق لجّ………بعضه فى بعضه ترادف لجّ

نصفو تثنى وآخر لجّ ………..لاطم أمواج من غير لج

رفع الهدب شفت محور ……….نوره تدفق صعد أتدور

فكر في شئ فضل أتصور…..بسم النوار فتح نور

فيه تأمل أيسر بند ……….لدن المثمر غصنه البندى

مايقه ترقرق شهر الهندي ……… فوح منو العرف الرّندى

العرف هي الرائحة الطيبة أما الرندى فهو من الرند وهو شجر طيب الرائحة…أما في نهاية الأغنية فيقول ودالرضى انه قد صحي من هذا النوم وحاول أن ينام مرة أخرى حتى يستمر الحلم ولكن هيهات يعود الكان ولى…

وصحيت ندمان نومي انقل……..ترخرخ جسمي وقواي كل ّ

تناوم غش لكن كلا………هيهات يعود الكان ولّى

وفى رواية أخرى …حاولت أنوم لكن كلا ….هيهات يعود الكان ولى

والعبادى جارى ود الرضي في كسرة هذه الأغنية أيضا حيث قال في أغنية بلابل الدوح …عيد لي النوم من اجل خيالك ……

شكرا جزيلا العمرين:
الأستاذ عمر حبيب
والأستاذ عمر إدريس
على إثراء البوست وإليكما أهدى هذه:

يا عـــــــــازة الفـــــــراق بي طـــــــــــال
كلمات الشاعر/ إبراهيم العبادى

يا عازه الفراق بي طال
وسال سيل الدمع هطال
***************
طريت برق الفويطر الشال
وساح دمعي البكب وشال
كمل صبري ومنامي إنشال
لبس من ناري عمه وشال
***************
أرض آمالي في امحال
ومن الهم بقيت في أوحال
وبعدك عزه ساء الحال
منامي وصبري أضحى محال
***************
حليل الناسا وناسا
طريت أم در حليل ناسا
وكيف أنساها وأتناسا
ومفتون بي ظبي كناسا
***************
ولع جوفي جمري الحي
وما بتطفيهو آه وأحي
فيا زينة ربوع الحي
لي دياركم يعود الحي

القصيدة الخالدة أنا بيك سعاتي مؤكدة
للشاعر الرقيق عبد الرحمن الريح

أنا بيك سعاتي مؤكدة .. وبلاك حياتي منكدة
حرام عليك يا جميل .. ما بصح عليك تعمل كدا

يامن محاسنك بي قلوب عاشقين مستفردة
خليتني أشكو من الغرام وأقول حقائق مفردة
وأقول حبيبي عمل عدوي خلاني لي الأذى و الردا
ما عندي مانع حتى لو ضيعني ساكن الموردة

أنا بي محاسنك بفتخر وإنت المحاسن سيدا
يومي الأشوفك يبقى عيد والدنيا تبقى معيدة
البدر إن شافك يزول من الأنوار الجيدة
أما الشمس لو شافتك ترجع أسيرة مقيدة

أنا طرفي شايفك يا جميل أخد اللجين العسجدة
مهما أعاين في الشباب وين ذي محاسنك أوجدا
قبال أراك أنا كنت في أيام جميلة ممجّدة
متى روحي من بعد العزاب تشفق عليها وتنجدا

بقا عقلي مشغول بي الوصال والكان ديما مهودة
خايفك تحرض يوم لقاي وأيام عذابي تزوّدا
بالنفرة والجفا والصدود مثلتا غزلان الودا
نفسك على تجور بالبعاد والعزلة والعوئدة

يامن على حرب العشوق لحظك جيوشو مجندة
وقامتك تطيبك كأنها مخلوقة من قطر الندى
والحكمة في كونك بخيل وأهلك أرابيب الندى
أصلك بتدلل على ... ولا الحكاية معاندة !!!

شوكرن يا أستاذة وصال على الهدية ..الهدية

ليّ في المســــــــــالمة غــــــــــــزال
كلمات الشاعر/ عبدالرحمن الريّح

ليّ في المسالمة غزال ..
نافر بغني عليهو
جاهل وقلبو قاسي وقلبي طائع ليهو
مصباح الظلام الـ ربنا معلّيهو
زايد في الجمال نور الجمال جالّيهو
لو شافو الغزال على نفرتو بواليهو
وإن شافو القمر أنوارو تخجل ليهو
إن جاه النسيم زي الفرع يتنيهو
والثمر الرطيب كذب البقول يجنيهو
باللمي والخدود ياذا العشوق بفنيهو
الصحا والنعاس والسحر في عينيهو
كل من شافو قال أنا بالنفس أفديهو
هو غصن الرياض الزاهي في واديهو
أزهار الربيع مازج زهور خدّيهو
وجدلات الحرير ما لينة ذي إيديهو
والدو معجّنو على فطرتو مربّيهو
هو الفرد الوحيد في الدنيا ما في شبيهو
يتجاهل عليّ وأنا حالي ما غابيهو
سالبني في نار هواه شال قلبي يلعب بيهو
لىّ فى المسالمة غـــــــــــــــــــزال

غــــــــــــــزال الروض
كلمات الشاعر/ صالح عبدالسيد (أبوصلاح)
أداء/ كرومة وأبو داؤود

فيك رايح بالي
تفداك الروح
أظهر ولا تبالي
يا غزال الروض

في دجاك يا ليل
كم طيب..أقبل هبّالي
ده الجنن قيس
و كُثير قبّالي
متي لي يعود
عقلي ويصفالي
يرد الروح
في الجسم البالي

طيفك في النوم
لو كان يصفالي
أتغزل فيهو
ينظر لحالي
متي مني يفيق
عقلي ويصفالي
رحيق مختوم
في لهيجو الحالي

يا الفاطرك نور
وفاهك عسالي
جننت ألوف
عشّاق أمثالي
في حبك أضيع
و لهواك ما سالي
بس قصدي دوام
يا جميل تطرالي

حبك يمزج
أعضاي إجمالي
لو كنت يمين
يهواك شمالي
يا بديع ليه فيك
ضاعت آمالي
كان مالو هواك
يا مدلل ومالي

يا أنيس الصيد
الحاجبو هلالي
كان مالو هواك
يا مدلل ومالي
لا أسمع فيك
أقوال عزّالي
أسمع وأطيع
أمرك يا غزالي

أجســـــــــــامنا لــــــــــيه جســـــــــــمين
كلمات/ صلاح عبدالسيد (أبوصلاح)
ألحــــان/ كرومـــــــــــة

أجـسـامـنـا لـيـه جـسـمـيـن
روحـنا واحـدة وليه إتقسمت قسمين
شئ عجيب في غرامك يا فريع ياسمين

أنـا ياحـبيبي تجدني علي هواك أمين
وفؤادي يحجزوعن أفكاري في التخمين
وحواسي تحسد نظري لحسنكم تضمين
و شمالي تاخدو الغيرة إذا جلست يمين

فيك يا حبيبي إثنين اللي المنام سالبين
هم شـالو نوم عينيّ و للضمير تاعبين
بي وجهك الكوكب يجهرني ساعة يبين
وبي قامتك اليايات الفي الصدير لاعبين

من المنام ما معاي و لا ستة من ستين
عـندي التلت من عقلي وعندك التلتين
شـايقاني بسمة فاهك درّ عقيدو متين
لـولاها ماليّ صالح في الزلال و التين

يـالفريد فـي ظرفك زيّ صداقتك وين
ماأظن تكون ولا بدعت قبل في التكوين
عـلي صـحيفة قـلبي تـدونت تدوين
و ديـن محـمد حـقّ لا يقبل التلوين

يامـن أسرت فؤادي ملكتو في اليدين
يـامـلفـت الأنـظار يـاناير الخدين
نـحـن الجميع مادمنا قلوبنا متحدين
تـبقي الصداقة قرابة و نكسب الودين